أصعب سؤال اللي جوابه للأسف مثله سؤال..

أصعب سؤال اللي جوابه للأسف مثله سؤال..

ماهو تفلسف إلا موقف صار وإسمع ثاني بيت..

البارحة يومه سأل وش ذكرك ذيك الليال?

كان الجواب بكل بساطه:من متى أصلآ نسيت!?

أدري بإن جمع الصعوبه والبساطه شئ خيال..

لكنها صارت كذا..واللي أهم إني دريت..

إن الحياة بفقد أحبابك إذا جف الوصال..

تعيشها لوتقتنع إنك خلاص أصبحت ميت..

ياصاحبي لوكل شئ يمر بالخاطر يقال..

ماكانت العبره تولجني إلامنك طريت..

شفني قدرت أحبس دموعي بس دمع القاف سال..

وياكبرها ساكت ولكن داخل أوراقي بكيت..

الحال في بعدك قسم بالله ماسميه حال..

أنوي على الضحكه وأحس كلي خطأ لأني نويت..

أتصور إني من رحلت أشوفك لجسمي ظلال..

لاشفته أمشي بأبتعد وأثره معي مهما مشيت..

مدام يعني في بحرك لفرحتي مليون جال..

وش فيه موجك ماركد قربت أموت ومارسيت..

يرضيك..ماعادت معي تفرق إذا جاءلك مجال..

لأني أقتنعت إنك نهايه وأني بأبطي مابديت..

صرت أعقد حجاجي أذا جابوك بأطراف الجدال..

وأنا قبل لاجابوا أسمك كني ميت ثم حييت..

تعبت أعيش الدور وأفتح للمعاذير الخيال..

وأتخيل إني جيت في بالك وبأنك أستحيت..

وترد لي كلك وله وتقول:كن البعد طال?!

ومن الفرح ماأعاتبك وأقول:ياخي مابغيت..

حتى وأنا أتخيل(نظرتك) لأن قلبي لايزال..

يكررأسمك داخل أعماقي بنبضه لاسهيت..

قلي شأسوي فيك وأنت بداخلي أصدق مثال..

للحب وإحساس القصيد إن عانق الليل وسريت..

ربي يصبرني على الفرقى مدام الحظ مال..

وأنت بيجي لك يوم تعرف في بعدك كم شكيت..

وإذا بلاك الله وعذبك إشتياقك بس تعال..

وأقرأ القصايد في غيابك كل أبوها بيت بيت..

وبتدري إن أصعب سؤال اللي يجي رده سؤال...

لاقلت لي.:وش ذكرك? ثم قلت لك:متى نسيت..